Rat-Zinger y Skontra nel tercer conciertu de Glayíos/Oihuak

Rat-Zinger y Skontra nel tercer conciertu de Glayíos/Oihuak

Punk amestáu a rock, metal, hardcore, folk y ska. El tercer conciertu de Glayíos/Oihuak ta dedicáu a la concepción más amplia del punk. El personal estilu de los bilbaínos Rat-zinger y el punk-folk de los asturianos Skontra, protagonicen el 29 de mayu una nueva entrega d’esti ciclu d’intercambios musicales impulsáu por Ixuxú Asturies-Euskal Herria elkartea. Amás, nesta ocasión los dos grupos van presentar los sos nuevos discos na sala Sir Laurens d’Uviéu.

Rat-Zinger nun ye punk-rock, nun ye hardcore, nun ye hard-rock, nun ye metal… Ye too ello y más. Ye la rabia de cuatro músicos curtíos en mítiques bandes bilbaínes, uníes agora pa escabezar a toa autoridá. El so soníu llevó-yos a ser ún de los grupos revelación del rock estatal y el so demoledor directu a pisar los festivales cimeros. La xira del so tercer discu ‘Rock and roll para hijos de perra’, va ser la vuelta a Asturies de los fíos bastardos del papa de Roma.

Skontra van del punk al folk. Pel mediu meten ska, hardcore y reggae entemecíu a lletres reivindicatives nes que nun falta la ironía. Amás de ser una de les bandes más vieyes de rock n’asturianu, ye tamién de les más internacionales; con xires per Holanda, Alemaña y conciertos en festivales de renome de la Península. ‘Foguera’ ye’l so próximu discu, cuarta referencia discográfica que va salir a la cai coincidiendo con esti conciertu.

Entraes anticipaesDende’l 11 de mayu van tar disponibles les entraes en dellos llocales del centru y oriente asturianu. Acordies a la filosofía del proyectu d’ufrir música en directo de calidá a precios afayadizos, van costar cinco euros anticipada y ocho na puerta. Amás va existir una ufierta llimitada col oxetivu de fomentar la venta de discos y da-y puxu asina a la industria musical: entrada anticipada xunto a un cedé de cualquiera de les dos bandes, por doce euros.

Esti conciertu ye la continuación de ‘Glayíos/Oihuak. Música en Movimientu’, ciclu d’intercambios musicales ente grupos asturianos y vascos nel que yá participaron nel mes de xineru Skama la Rede y Skakeitan y en marzu Niña Coyote eta Chico Tornado y Sombra. Tres el conciertu de mayu, el ciclu retoma en setiembre y payares cola fusión, el reggae, el hiphop, la electrónica y el folk como protagonistes.