El Festival de Cultura Urbano de Samartín anuncia les feches de la so cuarta edición

L’asociación Que Nun Apare torna a cellebrar la cita en xunu los díes 12, 13 y 14

Dende 2017 en Samartín del Rei Aurelio l’asociación ensin ánimu de llucru Que Nun Apare  ye la encargada de la organización del Festival de Cultura Urbano del conceyu. Una cita na que’l típicu conceptu de “Cultura Urbana” arriquez colo más llocal, col arume de la cuenca y les tradiciones asturianes, pero siempre con propuestes modernes, fresques, qu’atraigan a la mocedá y a xente de toles edaes de dientro y fuera del conceyu.

Nesti 2020 l’eventu torna a cellebrase en varios llugares, el viernes 12 de xunu les actividaes van desendolcase en L’Entregu dende la tarde y van servir d’entamu del festival que, como yá acolumbra pol nome de la organización, nun va a aparar, continuando nel Parque del Florán el sábadu 13. Como novedá en rellación a l’anterior edición, esti añu l’asuntu va allargase un puquiñin más y el domingu 14 les actividaes d’ociu nun van aparar nel Parque del Florán.

Esti festival, pol que nun se cobra entrada y que cada vegada ta más consolidáu na escena underground del norte, sigue evolucionando y como valor añadíu nun tien namás conciertos d’estremaos xéneros musicales y sound system, sinón que tamién ufre talleres, concursos y otres actividaes que los organizadores van dir anunciando nos sos perfiles nes redes sociales hasta’l cartel definitivu que desvelarán na primavera.